header image  
Cystadleuaeth

Newyddion Diweddaraf

Pesda Roc

Dydd Iau Mai 17 2012

Mae 2012 yn addo bod yn flwyddyn anhygoel i drefnwyr Pesda Roc. Maent newydd ennill gwobr RAP C2 Radio Cymru am ddigwyddiad byw y flwyddyn ac maent yn awr yn edrych ymlaen at Pesda Roc 2012 a gynhelir ym mis Awst. Yn ogystal â’r ŵyl honno, mae nifer o nosweithiau eraill yn cael eu trefnu ym Methesda.

Ar 2 Mehefin bydd Neuadd Ogwen yn croesawu Edward H. Dafis. Mae’r grŵp wedi ail-ffurfio yn ddiweddar dan yr enw H a’r Band. Byddant yn perfformio caneuon newydd yn ogystal â’r clasuron. Dyma un o fandiau mwyaf poblogaidd y sin roc Gymraeg erioed ac nid oes unrhyw syndod felly bod llawer o fwrlwm ynghylch y gig hwn. Bydd pryd o fwyd yn cael ei baratoi ar y noson gan Gaffi Coed-y-Brenin. Cofiwch gael eich tocyn mewn da bryd o Siop Kath, Bethesda am £10.

I gyd-fynd â Sioe Ogwen, ar 9 Mehefin, mae Pesda Roc wedi cyd-weithio gyda Chlwb Ffermwyr Ifanc Dyffryn Ogwen i greu gig gyda’r nos. Bydd Bryn Fôn a’r Band ac Y Bandana yn Neuadd Ogwen am 8.00pm, ar ôl y Sioe. Y gobaith yw y bydd hyn yn dechrau traddodiad blynyddol i noson y Sioe ac yn rhan o ffurfio perthynas gydweithredol newydd rhwng Ffermwyr Ifanc Dyffryn Ogwen a Pesda Roc.

Mae Pesda Roc hefyd yn trefnu nosweithiau ar gyfer cynulleidfa ifancach. Ar 7 Gorffennaf bydd Race Horses yn Neuadd Ogwen i ddechrau’r gyfres honno o gigs. Sefydlwyd pwyllgor ifanc Pesda Roc yn Ysgol Dyffryn Ogwen a byddant yn chwarae rhan flaenllaw yn y trefniadau. Mae Pesda Roc wedi bod yn cynnig Cwrs Technoleg Cerdd yn Neuadd Ogwen dan arweiniad Aled Huws (Cowbois Rhos Botwnnog). Mae’r rhai sydd wedi bod yn mynd i’r gweithdai hyn wedi dysgu pob math o bethau am y sîn roc Gymraeg, o sut i greu gigs i sut i recordio caneuon. Hoffai criw Pesda Roc ddiolch i bawb am yr holl gefnogaeth ac edrychwn ymlaen at eich gweld yn y nosweithiau hyn.

Rho sylw

Singing for the Brain

Dydd Iau Mai 17 2012

Bydd sesiynau ‘Singing for the Brain’ yn cael ei cynnal gan y Gymdeithas Alzheimers yng Nghanolfan y Crynwyr, Bangor bob yn ail dydd Iau.

Mae Singing for the Brain yn wasanaeth a gynigir gan Cymdeithas Alzheimers, sydd yn defnyddio canu i ddod a pobl at ei gilydd mewn awyrgylch cyfeillgar a chyffrous.

Nid yn unig for canu yn weithgaredd i’w fwynhau, oed gall gynnig ffordd i bobl gyda dementia, gyda’i gofalwyr, i fynegi eu hunain a chymdeithasu gyda eraill mewn grŵp hwyliog a chefnogol.

Wedi ei guddio o fewn yr hwyl mae gweithgareddau sy’n adeiladu ar ran o’r cof ar gyfer canu a cherddoriaeth. Pan mae atgofion yn anodd i’w hadennill, mae cofio cerddoriaeth yn haws.

Bu i Singing for the Brain gael ei gynnwys mewn rhaglen ddogfen ar gyfer BBC Radio 4 a oedd yn edrych ar arwyddocâd emosiynol darn o gerddoriaeth Handel – Hallelujah Chorus.

Bydd sesiynau Bangor bob yn ail wythnos ar ddydd Iau yng Nghanolfan y Crynwyr rhwng 10:30yb a 12:30yp. Bydd y sesiwn nesaf yn cael ei gynnal ar 30ain o Fai.

Rho sylw

National Theatre Wales – Galwad am gynigion – Prosiect cynulliad Gogledd Cymru

Dydd Mercher Mai 9 2012

Mae Cynulliad ‘National Theatre Wales’ yn datblygu prosiectau a fydd yn cael ei cynnal ar hyd a lled Cymru.

Mae ymarferion yn cael ei cynnal ar hyn o bryd ar gyfer Cynulliad 02 yng ngorllewin Cymru a fydd yn cael ei gynnal ar Fai 4ydd ac mae Cynulliad 03 angen eich pleidleisiau ar lein er mwyn penderfynu pa brosiect fydd yn cael ei ddewis. Ond mae angen cynigion ffres a chyffrous ar gyfer Cynulliad 04 fydd yn cael ei gynnal yma yng ngogledd Cymru. Felly, beth am gynnig syniad yn eich ardal chi? A chreu perfformiad dadleuol a fydd yn codi trafodaeth yn eich ardal.

Fel y digwyddodd gyda’r tri prosiect blaenorol, mae’r cwmni yn gofyn i bobl leol, cwmnïau a grwpiau i gynnig syniadau ar gyfer prosiect, o’r prosiectau yma bydd 3 yn cael ei roi ar restr fer fydd yn cael ei rhoi ar y we er mwyn i’r cyhoedd benderfynu drwy bleidleisio pa brosiect fydd yn cael ei ddewis. Yna, bydd Abdul Shayek, Cysylltydd Creadigol ‘National Theatr Wales’ yn dechrau y broses mis o hyd o ddatblygu’r syniad, gyda 3 o berfformwyr Cynulliad a 3 aelod o’r staff cynhyrchu a fydd yn diweddu mewn cyfnod o wythnos o ymarferion dwys a fydd yn arwain at ddigwyddiad diwrnod o hyd.

Mae ‘National Theatre Wales’ yn gallu eich cefnogi eich syniad yn yr ardal drwy:

• 5 diwrnod dwys o ymarfer yn arwain at y digwyddiad

• 3 perfformwyr / artistiaid (Tîm perfformio Cynulliad)

• Cyfarwyddwr

• Tîm Cynhyrchu – sy’n cynnwys rheolwr cynhyrchu, Rheolwr llwyfan a thechnegydd

• Cyllideb cynhyrchu bychan

Fe hoffai’r cwmni i bobl anfon syniadau am brosiect sydd ar eich meddwl, a fydd yn amlygu problemau sydd i’w gweld yn lleol a gyda’r bwriad o godi trafodaeth. Maent yn chwilio am syniadau a all gael eu cynnal mewn lleoliadau anghyffredin.

Mae angen i’r syniadau fod ar gyfer gogledd Cymru.

Er mwyn cael ffurflen gais neu mwy o wybodaeth cysylltwch a Abdul Shayek – abdulshayek@nationaltheatrewales.org

Dyddiad Cau – 12yp – 29ain o Fai.

Rho sylw

Cwrs i Artistiaid mewn Ysgolion

Dydd Mawrth Mai 8 2012

Cwrs deuddydd –3 a 4 o Orffennaf yn Swyddfa Cartrefi Cymru, Cyn-Eglwys y Santes Fair, Tremadog.

Trefnir y cwrs gan Asiantaeth Gelfyddydol Ysgolion Gwynedd a Môn. Bydd y cwrs yn ymdrin a theori ac ymarferiad cynnal gweithdai celfyddydol mewn ysgolion gydag ymarferion mewn cynllunio a chynnal gweithdai, gan gynnwys celfyddydau cyfunol. Darperir llawlyfr gwybodaeth cynhwysfawr i’r myfyrwyr sy’n cynnwys cyngor ar ymarferiad proffesiynol. Awdur y cwrs, Maria Hayes, sydd gan dros ugain mlynedd o brofiad mewn arwain gweithdai drwy gydol yr D.U, fydd yn arwain y cwrs. Bydd y cwrs yn cael ei gynnal drwy’r Saesneg.

Byddwn yn blaenoriaethu gofod i artistiaid o Wynedd a Môn.

Cost y cwrs deuddydd fydd £20 – sy’n cynnwys ffi y cwrs, cinio a’r pecyn gwybodaeth.

Am fanylion pellach cysylltwch a Gwawr Wyn Roberts / Annes Sion – 01286 679721 / 07789 032517 neu AnnesSion@gwynedd.gov.uk

Rho sylw

Arddangosfa Celf Agored 2012

Dydd Iau Mai 3 2012

Oriel Pendeitsh, Caernarfon – Mai 12 – 8 Gorffennaf

Mae Oriel Pendeitsh, Caernarfon yn arddangos cyfoeth o waith celf gan 38 o artistiaid gwahanol. Ewch draw i gael gweld yr amrywiaeth – mae mynediad am ddim.

Dyma ddetholiad o’r gystadleuaeth flynyddol Celf Agored 2012 a gynhelir yn Amgueddfa ac Oriel Gwynedd, Bangor. Mae’r arddangosfa arbennig hon sy’n cael ei chynnal yn Oriel Pendeitsh o Mai 12 hyd 8 Gorffennaf yn gyfle eto i weld yr amrywiaeth o waith celf a ddewisiwyd gan gynnwys paentiadau, gwaith argraffu, darluniau a ffotograffau.

Bu panel o ddetholwyr yn dewis beth i’w arddangos allan o bron 200 o geisiadau. Rhoddwyd gwobr y detholwr eleni i Martin Morley o Fethesda am ei baentiad o ‘Treflan, Bethesda, 1989’. Yn rhodd gan Gyfeillion yr Amgueddfa, cyflwynwyd gwobr ychwanegol eleni i Emyr Roberts am ei ffotograff trawiadol ‘Arwel a Ffrind’. Yn ystod yr arddangosfa yn Amgueddfa ac Oriel Gwynedd, fe ddyfarnwyd drwy bleidlais y cyhoedd y darlun ‘Stryd Tiwlipau’ gan Dorothy Williams o Dregarth yn fuddugol am wobr Dewis y Bobl. Rhoddwyd cymeradwyaeth uchel i nifer o weithiau celf eraill yn ogystal.

Dywedodd Delyth Gordon, Swyddog Celf Weledol Cyngor Gwynedd: “Mae’r arddangosfa celf agored yn gyfle gwych i artistiaid gyflwyno eu gwaith i’r cyhoedd. Mae amrywiaeth eang o waith i’w weld gyda rhywbeth yn siwr o fod at ddant pawb. Croeso i bawb ddod i fwynhau y gwaith celf.”

I’r rhai sydd a diddordeb mewn cynnig gweithiau celf i’w dethol ar gyfer Celf Agored 2013, gellir gadael manylion yn Amgueddfa ac Oriel Gwynedd, Bangor, ffôn 01248 353 368.

Mae’r arddangosfa yn Oriel Pendeitsh, Caernarfon ar agor hyd 8 Gorffennaf. Mae’r oriel ar agor pob dydd, 7 diwrnod, rhwng 9.30am a 4pm. Mynediad am ddim.

Rho sylw

Galw ar bobl i stiwardio!

Dydd Gwener Ebrill 27 2012

Mae angen pobl i stiwardio ym Mhabell Arddangosfa Celf, Dylunio a Thechnoleg yn ystod Eisteddfod Genedlaethol yr Urdd Eryri 2012.

Mae’r Eisteddfod yn cael ei chynnal ym Mharc Glynllifon yn ystod wythnos gyntaf Mis Mehefin. Er mwyn sicrhau llwyddiant y babell mae angen nifer o stiwardiaid. Bydd stiwardiaid yn cael tocyn am ddim i’r maes.

Os yr hoffech gynorthwyo cysylltwch a ni drwy gysylltu a Anwen Bumby ar A.Bumby@btinternet.com

Rho sylw

Cystadleuaeth Ysgrifennu Newydd

Dydd Mercher Ebrill 25 2012

Cystadleuaeth ysgrifennu Tŷ Newydd a Gŵyl Gwanwyn.

Ydych chi dros 50? Ydych chi’n byw yng Nghymru? Ydych chi wedi ysgrifennu cerdd neu stori fer?

Cyfle i ennill cwrs ysgrifennu -gwerth dros £500 . A chyfle i chi gyhoeddi eich gwaith ar wefan Tŷ Newydd yn ystod Gŵyl Gwanwyn.

Gwnewch gais drwy lythyr ar Tŷ Newydd, Llanystumdwy, Cricieth, Gwynedd, LL52 0LW neu trwy e-bost alys@llenyddiaethcymru.org <mailto:alys@llenyddiaethcymru.org>. Bydd angen i chi gynnwys:

• Unai cerdd (dim mwy na 40 llinell o hyd) neu stori fer (dim mwy na 3,000 o eiriau o hyd)

• Brawddeg yn esbonio pam yr hoffech ddod ar gwrs i Tŷ Newydd

• Eich manylion cyswllt – Rhif ffôn, e-bost (os oes gennych) a chyfeiriad.

Cyfle i awduron newydd yw hwn. NID ar gyfer pobl sydd eisoes wedi cyhoeddi gwaith.

Dyddiad cau: Mai 15fed.

Bydd gwaith yr enillwyr a’r rhestr fer yn cael ei gyhoeddi ar y wefan. Trwy wneud cais rydych yn cytuno i gyhoeddi eich gwaith ar wefan Tŷ Newydd.

Mwy o wybodaeth? Cysylltwch alys@llenyddiaethcymru.org neu 01766 523737.

Rho sylw

Holiadur Gwirfoddoli: Cyfle i ennill £50

Dydd Llun Ebrill 23 2012

Gwasanaethau Amgueddfeydd ac Orielau Gwynedd yn bwriadu cynnig mwy o gyfleoedd gwirfoddoli yn y dyfodol. Drwy gwblhau’r holiadur isod byddwch yn ein helpu i gael gwell dealltwriaeth o wirfoddoli ac i gael gwell syniad o’r diddordeb fyddai gan aelodau o’r cyhoedd mewn cyfloedd gwirfoddoli o’r fath.

Croesewir ymateb gan bawb sy’n 16 mlwydd oed neu’n hŷn ag sy’n byw yng Ngwynedd, Ynys Môn neu Conwy. Am gyfle i ennill £50 cwblhewch yr holiadur atodol a’i ddychwelyd i’r cyfeiriad isod erbyn Dydd Sadwrn 30 Mehefin 2012.

Y cyfeiriad ydy:

Mantell Gwynedd,

Rhadbost NWWW 4062A,

Caernarfon,

Gwynedd,

LL55 1ZZ.

Cliciwch yma i gael gweld yr holidaur.

Os oes gennych gwestiynau pellach ynglŷn â’r holiadur yma, cysylltwch gyda:

Rhianon Jones Ffôn: 01286 672626 Ebost: rhianon@mantellgwynedd.com

Rho sylw

Pesda Roc yn cyflwyno Geraint Lovgreen a’r Enw Da

Dydd Llun Ebrill 23 2012

Pesda Roc yn cyflwyno Geraint Lovgreen a’r Enw Da. Mae Geraint Lovgreen yn enw cyfarwydd mewn sawl maes ac wedi bod yn perfformio ers yr wythdegau. Mae’n artist hynod o boblogaidd ar draws Cymru. Dywedodd Dyl Mei,”Mae angen i ochr ddifrifol Geraint Løvgreen gael mwy o glod. Yn enwedig y baledi; mae’n nhw’n sefyll fyny i bobol fel Meic Stevens a Gai Toms. Mae yna rywbeth am Geraint, ’swni’n gallu ei ddisgrifio fel y Tom Waits Cymraeg. “Bydd yn perfformio gyda’i fand, Yr Enw Da yn Neuadd Ogwen Nos Wener Mai 4 am 7. Mae tocynnau’n £10 ac ar gael o Siop Kath, Bethesda. Mae pryd o fwyd wedi ei baratoi gan Caffi Coed-y-Brenin yn gynwysedig yn y pris. Nifer cyfyngedig o docynnau ar gael, mae hi’n addo bod yn noson i’w chofio.

Rho sylw

Arlunydd buddugol arddangosfa flynyddol Celf Agored yn Amgueddfa ac Oriel Gwynedd, Bangor

Dydd Llun Ebrill 23 2012

Yn ystod yr arddangosfa flynyddol Celf Agored ddiweddar yn Amgueddfa ac Oriel Gwynedd, fe ddyfarnwyd y darlun ‘Stryd Tiwlipau’ gan Dorothy Williams o Dregarth yn fuddugol gan Dewis y Bobl. Gwelir hi yma yn derbyn ei gwobr gan Jeremy Yates ar ran Cyfeillion yr Amgueddfa a roddir y wobr hon yn flynyddol i’r gwaith sydd yn derbyn y mwyafrif o bleidleisiau gan y cyhoedd yn ystod cyfnod yr arddangosfa.

Bydd cyfle i weld y darlun yma ynghyd a detholiad o weithiau eraill o’r Celf Agored mewn arddangosfa lai o rai o’r paentiadau hyn ar safle arall Cyngor Gwynedd, sef Oriel Pendeitsh yng Nghaernarfon o 12 Mai – 8 Gorffennaf.

I’r rhai sydd a diddordeb mewn cynnig gweithiau celf i’w dethol flwyddyn nesaf gelli’r cael manylion yn Amgueddfa ac Oriel Gwynedd, Bangor.

Ffôn: 01248 353 368

Mawrth – Gwener 12:30 – 4:30, Sadwrn 10:30 – 4:30

Oriel Pendeitsh, Caernarfon, Mai 12 – 8 Gorffennaf.

Ffôn: 01286 676 476

Llun – Sul 9.30 – 4.00.

Rho sylw